Ba é ‘Luathrabhaidh do Chách’ an príomhábhar a pléadh ag Seisiún Urghnách Chomhdháil na hEagraíochta Domhanda Meitéareolaíochta sa Ghinéiv an tseachtain seo.
24 Deireadh Fómhair 2025
Ag an imeacht seo, tháinig ionadaithe ó sheirbhísí náisiúnta meitéareolaíochta agus hidreolaíochta, chomh maith le ceannairí stáit, ionadaithe rialtais agus institiúidí ón earnáil phríobháideach as na 193 stát agus críoch atá ina mbaill den Eagraíocht Mheitéareolaíochta Dhomhanda (EMD), le chéile. Comóradh dhá rud leis an imeacht: comóradh 75 bliain ar bhunú na EMD mar ghníomhaireacht speisialaithe de chuid na Náisiún Aontaithe, agus pointe leathbhealaigh an tionscnaimh ‘Luathrabhaidh do Chách’ (EW4All).
Ina ról mar an dara Leas-Uachtarán ar EMD Eoin Moran, Stiúrthóir Met Éireann, ar dhuine de na daoine a bhí taobh thiar de na tionscnaimh; bhí sé sa Ghinéiv chun cathaoirleacht a dhéanamh ar shraith comhchainteanna agus seisiún le linn na comhdhála ceithre lá, lena n-áirítear maoirseacht a dhéanamh ar ghlacadh na Rialachán maidir le Seirbhísí Luathrabhaidh.
Eoin Moran, Stiúrthóir Met Éireann agus an dara Leas-Uachtarán ar EMD (ar dheis ar fad), ar an ardán in éineacht le hUachtarán EMD, an Dr Abdulla Al Mandous (an dara duine ón taobh deas), Ard-Rúnaí na Náisiún Aontaithe, António Guterres (an tríú duine ón taobh deas), agus Ard-Rúnaí EMD, Celeste Saulo (an ceathrú duine ón taobh deas) ag Comhdháil Dhomhanda na Meitéareolaíochta
Tá sé mar aidhm ag an tionscnamh EW4All, a sheol Ard-Rúnaí na Náisiún Aontaithe António Guterres sa bhliain 2022, a chinntiú go mbeidh gach duine ar domhan faoi chosaint ag córais luathrabhaidh ilghuaise faoi dheireadh 2027.
Bhí an tUasal Guterres sa Ghinéiv freisin chun an chéad óráid riamh a thabhairt uaidh do EMD; ina cuid cainte, d’iarr sé go leathnófaí go tapa na córais luathrabhaidh chun saolta agus geilleagair a chosaint.
D’athluaigh Ard-Rúnaí EMD, Celeste Saulo, an tuairim sin agus d’eisigh sí ‘Glao chun Gnímh’ foirmiúil chuig gach ball, comhpháirtí agus páirtí leasmhar, ag iarraidh orthu gníomhú go práinneach agus go haontaithe chun cur i bhfeidhm EW4All a luathú.
“Táimid ag teacht le chéile agus ní raibh ár misean riamh chomh práinneach is atá sé anois. Mar sin féin, ní hamháin gur tráth dhúshláin é seo — ach tá deis mhór inti freisin chun leas a bhaint as eolas faoin aeráid agus as dul chun cinn teicneolaíochta chun todhchaí níos athléimní a chruthú do chách,” a dúirt sí.
“Ba mhaith liom béim a chur arís eile ar an ngá práinneach le scála na gcóras luathrabhaidh ilghuaise agus na réamhaisnéise bunaithe ar thionchar a mhéadú chun; Seirbhísí Náisiúnta Meitéareolaíochta agus Hidreolaíochta a chumasú; líonraí breathnóireachta agus malartú sonraí a leathnú; agus an ciorcal a leathnú – do chomhpháirtithe agus do thairbhithe araon. Ní thig linn aon duine a fhágáil ar lár,” a dúirt sí.
Is é EMD an guth údarásach i gcóras na Náisiún Aontaithe maidir le staid agus iompar atmaisféar an Domhain, an idirghníomhaíocht atá aige leis an talamh agus leis na haigéin, an aimsir agus an aeráid a chruthaíonn sé, agus an dáileadh acmhainní uisce a eascraíonn astu sin.
Ó 1950 i leith, tá maoirseacht déanta ag EMD ar mhalartú saor in aisce sonraí agus breathnuithe, rud a leag an bhunchloch síos le haghaidh réamhaisnéisí feabhsaithe, le rabhaidh agus le seirbhísí eolaíocht-bhunaithe a shábhálann beatha agus a thacaíonn le forbairt inbhuanaithe.
Mar Sheirbhís Náisiúnta Meitéareolaíochta na hÉireann, tá bród ar Met Éireann a bheith ina ball de EMD, agus ba mhór an onóir di go ndearna na ballstáit eile Eoin Moran a thoghadh mar an dara Leas-Uachtarán uirthi ag Comhdháil Dhomhanda na Meitéareolaíochta i mí an Mheithimh 2023.
Is í Comhdháil Dhomhanda na Meitéareolaíochta an comhlacht uachtarach in EMD, agus is í an Ard-Chomhairle a chuireann a cinntí i bhfeidhm.